Жыл аягына чейин «Алтынкен» бюджетке 55,8 млн доллар салым кошот

"Алтынкен" кен ишканасы жыл аягына чейин мамлекеттик бюджетке жана Кемин-Келечеги өнүктүрүү фондуна 55,8 миллион доллар салым кошот. Бул тууралуу “Кыргызалтындан” билдиришти.

Анын 39,48 миллион доллары салык түрүндө, 4,1 миллиону өнүктүрүү фондуна жана 200 миңи кайрымдуулук түрүндө берилери пландалууда. 

“Жумуш менен 1350 адам камсыз болду, алардын 95%ы кыргыз жарандары. Компания экологияга өзгөчө көңүл буруп, жашылдандыруу долбоорлорун ишке ашырат. Буга мөмөлүү дарактарды, петунияларды жана роза гүлдөрүн отургузуу кирет. Ошондой эле, жыл ичинде суу чарба тутумунун 2# Flat Refuge курулушу аяктап, сууну кайра пайдалануу долбоору ишке ашырылды”, - деди “Алтынкен” ишканасынын башкы директору Вэнь Яфен “Кыргызалтын” ишканасынын төрагасы Элдияр Калдарбековдун Талды-Булак-Левобережный кенине болгон иш сапарынын алкагында. 

Ошол эле учурда, Элдияр Калдарбеков кытай тараптын өкүлдөрү менен жумушчу жолугушуу өткөрүп, баалуу металлдарды өндүрүү, геологиялык чалгындоо иштеринин пландары боюнча маселелерди талкуулады.