Былтыр Кыргызстан менен Өзбекстандын соодасы дээрлик 550 млн сом болгон

Экономика жана коммерция  министри Данияр Амангелдиев менен Өзбекстандын инвестиция, өнөр жай жана соода министри Лазиз Кудратов жолугушту. Бул тууралуу Экономика жана коммерция министрлигинин басма сөз кызматы билдирди. 

Жолугушууда 26-январда өтүүчү Кыргызстан-Өзбекстан бизнес форумуна даярдык көрүү, биргелешкен инвестициялык долбоорлорду ишке ашыруу маселелери, ошондой эле эки тараптуу соода-экономикалык кызматташуунун келечектүү багыттары талкууланды.

Кошумчалай кетсек, 2022-жылдын январь-ноябрь айларында Кыргызстан менен Өзбекстандын өз ара соода жүгүртүүсү 543,1 миллион долларды түзгөн.  Бул көрсөткүч 2021-жылдын ушул мезгилине салыштырмалуу 20,8%га көбөйгөн. Анын ичинде экспорт 211,8 млн доллар болсо (29,7%га өсүү), импорт 331,4 млн долларды  (15,7%га өсүш) түзгөн.