ЖК комитети Азербайжан менен өнүктүрүү фондун түзүүнү жактырды

Жогорку Кеңештин Бюджет, экономикалык жана фискалдык саясат боюнча комитети Кыргызстан менен Азербайжан өкмөтүнүн ортосундагы биргелешкен өнүктүрүү фондун түзүү жөнүндө долбоорду жактырды.  

Макулдашуунун максаты эки мамлекеттин чарба жүргүзүүчү субъекттеринин ортосундагы соода-инвестициялык жана финансылык мамилелерди тереңдетүү жана кеңейтүү, ошондой эле Кыргызстандын туруктуу социалдык-экономикалык өнүгүүсүн камсыз кылуу үчүн кошумча финансылык ресурстарды мобилизациялоо.  

“Фонд агроөнөр жай комплекси, тигүү жана текстиль, кайра иштетүү, тоо-кен металлургия өнөр жайы, транспорт, турак жай курулушу, соода, энергетикалык комплекс, инфраструктура өнүктүрүү, туризм жана башка секторлор сыяктуу тармактарда насыя берүү аркылуу Кыргызстандын экономикасынын артыкчылыктуу тармактарындагы өзүн-өзү актаган долбоорлорду каржылайт”, - деп түшүндүрдү Экономика министрлигинин басма сөз кызматы.

Аталган фондду фонддун кеңеши жана фонддун башкармасы жетектейт. 

Белгилеп кетсек, фонддун уставдык капиталына азербайжан тараптын салымы 25 миллион долларды түзөт.