Кыргызстандыктар бизнеске 16% менен насыя ала алышат

Чакан жана орто бизнес менен алектенүүнү каалагандар үчүн Каржы министрлигинин Ишкердикти өнүктүрүү фонду тарабынан жылдык 16% үстөк менен насыялар берилет. Бул тууралуу министрликтин басма сөз кызматы билдирди.

Кредиттер ачык акционердик коомдун микрокредиттик компаниясынын ишкердикти өнүктүрүү фонду аркылуу тартылат.

Негизинен айыл чарба жана айыл чарба продукциясын кайра иштетүүгө басым жасалууда.

"Ушул жылдын үч айында фонд тарабынан жалпысынан 147 субъектиге жеңилдетилген насыялар берилип, ошондой эле Баткен облусунун ишкерлери үчүн 13% үстөк менен кредиттик каржылоо каралган, бул жеңилдиктер аймактагы ишкердикти өнүктүрүүгө багытталган, - деп айтылат маалыматта.

Келечекте жеке ишкерлерге жеңилдетилген насыяларды берүүгө мүмкүнчүлүк түзүлөт.

Ишкердикти өнүктүрүү фондунун уставдык капиталы 600 миллион сомго жетет. Маалым болгондой, өткөн жылы Каржы министрлиги фонддун жалгыз акционери болуп, анын уставдык капиталын көбөйтүүгө каражат бөлгөн.