Ишканалар жер астындагы жана үстүндөгү сууларды коргоого аз акча сарптай башташты

Кыргызстанда беш жылдын ичинде жер үстүндөгү жана астындагы сууларды коргоо боюнча ишканалардын жана уюмдардын чыгымдары жети эсеге кыскарды. Бул тууралуу Улуттук статистикалык комитеттин материалдарында айтылат.

2021-жылы республиканын ишканалары жер үстүндөгү жана жер астындагы сууларды коргоого 43,8 миллион сом жумшашкан. Эң көп чыгаша Ош шаарынын ишканаларына – 23,7 миллион сом, Жалал-Абадга – 9,1 миллион сом жана Ысык-Көл облусуна – 7,8 миллион сом туура келген.

Белгилеп кетсек, 2017-жылы ишканалардын тиешелүү чыгымдары 311,1 миллион сомду түзүп, 2021-жылга салыштырмалуу 7 эсеге көп болгон. Мында республиканын ишканалары жана уюмдары 2019-жылы жер үстүндөгү жана астындагы сууларды коргоого беш жыл ичинде эң аз каражат жумшашкан, анда бул сумма 31,1 миллион сомду түзгөн.