Мамкурулуш тарабынан 8 айдын ичинде курулуш иштерине 378 лицензия берилген

2020-жылдын 8 айынын ичинде Архитектура, курулуш жана турак жай-коммуналдык чарба мамлекеттик агенттигинин жөнгө салуучу иш бөлүмү тарабынан өлкө аймагында курулуш ишин жүргүзүүгө 378 лицензия берилген. Бул тууралуу аталган ведомстводон маалымдашты. 

Маалыматка ылайык, Бишкек шаарына – 205, Чүй облусуна – 30, Талас облусуна – 8, Ысык-Көл облусуна – 10, Ош облусуна – 96, Баткен облусуна – 5, Жалал-Абад облусуна – 21, Нарын облусуна – 3 лицензия берилди.

Лицензиялардын жалпы санынан, 374 лицензия Кыргыз Республикасынын юридикалык жактарына жана 4 жеке ишкерлерге берилген.

Белгилей кетсек, биринчи жолу 277 уюм лицензиясын алган, ал эми 4 уюмдун лицензиясы «Кыргыз Республикасынын аймагындагы чет мамлекеттердин ыйгарым укуктуу органдары тарабынан таанылган лицензиялардын реестрине» киргизилген.

Отчеттук мезгилдин ичинде бардыгы болуп лицензия алуу боюнча 385 арыз кабыл алынган.