Мейманканалардын жана ресторандардын кирешеси 2,7 млрд сомго көбөйдү

Быйылкы жылдын январынан сентябрына чейин мейманканалар жана кыска убакытка жашоо үчүн жайлар, ошондой эле коомдук тамактануучу жерлер, анын ичинде мобилдик жана башка тамак-аш менен камсыздоо кызматтардын көлөмү 12 миллиард 65,4 миллион сомду түздү, деп жазады Улуттук статистикалык комитет.

Бул өткөн жылдын тийиштүү мезгилине салыштырмалуу 2 миллиард 703 миллион сомго же 18,8%га көп.

Мекеменин маалыматы боюнча, бул багыттар боюнча кызмат көрсөтүүлөрдүн көбү Бишкек шаарында – 5,9 млрд сом суммасында көрсөтүлгөн. Экинчи орунда Ош шаары турат — 1,6 миллиард сом. Кызмат көрсөтүүлөрдүн эң азы Нарын районундагы мейманканалар, кафе-ресторандар тарабынан болуп, тейлөөнүн көлөмү 32 млн сомду түздү.

Бул сумманын негизги үлүшү – 11 миллиард 224 миллион сому ресторандар, барлар жана башка коомдук тамактануу пункттары, анын ичинде мобилдик жана башка тамак-аш кызматтары көрсөткөн кызматтардын көлөмүнө туура келет. Мейманканалар жана кыска мөөнөттүү жайгаштыруучулар тарабынан көрсөтүлгөн кызматтардын көлөмү 820 миллион сомду түздү.