Кыргызстанда дары-дармектерди көзөмөлдөө системасы ишке кирди

Кыргызстанда дарыларды көзөмөлдөө системасы ишке киргизилди. Бул тууралуу Саламаттык сактоо министрлигинин басма сөз кызматы билдирди.

Министрликтин маалыматы боюнча, иштелип чыккан система контрафакттык медициналык буюмдар менен күрөшүү аркылуу дары-дармектердин жана медициналык буюмдардын коопсуздугун камсыз кылат.

"Тутум дарыларды өлкөгө импорттоодон баштап, акыркы керектөөчүгө чейин аптекаларга чейин көзөмөлдөй алат, ошондой эле конкреттүү дары-дармектердин бар экендиги тууралуу маалымат ооруканаларда да жеткиликтүү болот. Жарандар мобилдик тиркеме аркылуу сатылып алынган дары-дармектин мыйзамдуулугун текшерип, ал боюнча бардык керектүү маалыматты ала алышат", - деп айтылат маалыматта.

Система аркылуу чогултулган дары-дармекти керектөө маалыматтары саламаттыкты сактоонун улуттук стратегиясын иштеп чыгуу үчүн колдонулат. Бул система бүткүл Кыргызстан боюнча дары-дармек менен камсыздоонун абалын онлайн режиминде баалоого мүмкүндүк берет.

Саламаттык сактоо министри Гүлнара Баатырова буга чейин өлкө боюнча бардык дарыканаларды, фармацевтикалык компанияларды, саламаттыкты сактоо уюмдарын жана башка катышуучуларды системага кошууну тапшырган.