Быйыл эки айда фермерлер 414,4 млн сомго айыл чарба техникасын лизингге алышты

Былтыркы жылы фермерлер лизингге 983 айыл чарба техникасын алышкан. Бул тууралуу Айыл чарба министрлигинин басма сөз кызматы билдирди.

Белгиленгендей, жабдууларга 3 миллиард сом сарпталган.

Ошол эле учурда 2023-жылдын эки айында айыл чарба өндүрүүчүлөрү 414,4 миллион сомго 87 техника сатып алууга жетишкен.

Эске салсак, мамлекеттин колдоосу менен 2011-жылдан бери дыйкандарды айыл чарба техникасынын бардык түрү менен жеңилдетилген шартта камсыздаган жети лизингдик долбоор ишке ашырылып келет.

Бул долбоорлор "Айыл Банк" ачык акционердик коому аркылуу каржыланат. Фермерлер 7 жылдан 10 жылга чейинки мөөнөткө жылдык 6-9% менен жеңилдетилген шартта айыл чарба техникаларынын жана жабдууларынын бардык түрүн сатып ала алышат.