Социалдык фонд 2022-жылга банк кызматтарын сатып алууга тендер жарыялады. Бул тууралуу мамлекеттик сатып алуулар порталында жазылды.

Тендердик арыздын жалпы суммасы 10 миллион сомду түзөт. Ал эки лотту камтыйт. Биринчи лотко Социалдык фонддун жана отчеттуу бөлүмдөрдүн эсептерин тейлөө кирет. Анын ичинде АКШ доллары, евро жана орус рублиндеги камсыздандыруу төгүмдөрү боюнча эсептер.

Экинчи лот Мамлекеттик пенсиялык топтоо фондунун эсептерин тейлөөнү камтыйт, анын башкалардын арасында валюталык эсептери да бар.

Маалым болгондой, 12 ай ичинде Социалдык фонддун эсептериндеги акча каражаттарынын орточо жүгүртүүсү 36 миллиард 302 миллион 860,8 миң сомго бааланган.

Акыркы үч жылда банктык кызмат көрсөтүүлөр Соцфондго орто эсеп менен 10,7 миллион сом чыгым тартканын кошумчалайбыз.

Ошондой эле, "Айыл Банк" акыркы үч жылдан бери фонддун эсептерин тейлөө боюнча тендерлердин туруктуу жеңүүчүсү болуп саналат.