Кыргызстанда ишкердик менен жаңы гана алектенип баштаган же бизнести башкарган аялдарды колдоого багытталган “Бизнестеги аялдар” насаатчылык программасына кабыл алуу башталды. Кабыл алуу 6-апрелге чейин болот. 

Маалыматка ылайык, “Бизнестеги аялдар” насаатчылык программасынын үчүнчү фазасы ишке кирүүгө даярдалууда. Долбоорду Европа реконструкциялоо жана өнүктүрүү банкы (ЕРӨБ) Шери Блэр атындагы Аялдардын ишкердигин колдоо фонду менен биргеликте ишке ашырууда. 

“Программага ишкердик жана башкаруучулук тажрыйбасы бай насаатчы катары же чакан жана орто бизнести жогорулатуу, кесиптик көндүмдөрдү жана компетенцияларды өнүктүрүү, максатты туура коюу үчүн катышууга мүмкүн”, - деп айтылат маалыматта. 

Программанын үчүнчү фазасында берилген арыздардын негизинде тажрыйбалуу насаатчылардан жана бизнестеги аялдардан турган 30 жуп түзүлөт. 

“Насаатчынын милдети катышуучуга жеке жана кесиптик өсүүгө жардам берүү, бизнес-пландаштырууну, өнүмдү натыйжалуу жылдырууну, милдеттерди туура коюуну жана туура чечимдерди издөөнү үйрөтүү болуп саналат. Катышуучулар өз бизнесин өнүктүрүүгө, масштабдуу болууга умтулушу керек жана насаатчылар менен оффлайн жана онлайн жолугушууларды, ошондой эле семинарларды, тренингдерди, мастер-класстарды, тренерлер жана психологдор менен сессияларды камтыган жети айлык окуу процессине даяр болушу керек”, - деп айтылат маалыматта.

Жаңы сезондо программага тандоодо артыкчылык санариптик жана “жашыл” технологияларды колдонуу менен бизнес кылган аялдарга берилет. Байланыш англис тилинде жүргүзүлөт, анткени насаатчылар тобуна Европадан, АКШдан жана Африкадан келген бизнес адистери да кирет.