Айыл чарба министрлигинен билдиришкендей, быйыл кант кызылчасынан түшүмдү мол алуу күтүлүүдө. Учурда аны жыйноо иштери уланууда. Жылдын акырына чейин чарбалар 480 миң тоннага чейин кант кызылчасын жыйнап алуу пландаштырылган. Бул тууралуу вице-премьер-министр Бакыт Төрөбаев Чүй-Токмок кант кызылчасын кабыл алуу пунктуна болгон иш сапары учурунда билдирди.

Быйыл сапаттуу үрөн, керектүү түшүм жыйноочу техника жана ыңгайлуу аба ырайынан улам түшүмдүн мол экендиги белгиленди.

Чүй-Токмок кызылчасын кабыл алуу пунктунун иши менен таанышуу учурунда Бакыт Төрөбаев кызылчачыларды колдоо жана өстүрүлгөн түшүмдү кайра иштетүү максатында өлкөдөгү темир жол каттамына жеңилдетилген тарифти белгилөө чечими кабыл алынганын билдирди. Бул тариф 2016-жылдагы кант кызылчасын ташуу тарифи менен бирдей баада.

“Жогорку түшүмдүн аркасында ата мекендик кант заводдору 62 миң тоннадан ашык кум шекер өндүрүп, ички рыноктун керектөөсүн 50% камсыздайт. Ошол эле учурда жогорку түшүмдүүлүктү сактоо үчүн дыйкандарыбыз келечекте пилоттук долбоорлордун алкагында айыл чарбасында заманбап технологияларды, анын ичинде нымдуулукту сактоону активдүү колдонушу зарыл”, - деди ал.

Өз кезегинде “Кайыңды-Кант” жана “Кошой” акционердик коомдорунун өкүлдөрү кант кызылчасын темир жол менен ташуу үчүн беш жылдык мөөнөткө жеңилдетилген тарифтерди бекитүүнү сунушташты. Бул дыйкандарга айыл чарба өсүмдүктөрүнүн айдоо аянттарынан ишенимдүү түрдө 800 миң тонна канттын түшүмүн көбөйтүүгө мүмкүндүк берет. Бул өлкөнүн кум шекерге болгон ички керектөөсүн 100% камсыз кылып, импорттук канттын тартыштыгына жана андан кийин импорттолушуна байланыштуу тобокелдиктерди жокко чыгарат.

Жумушчу сапардын жыйынтыгында өлкөдөгү бардык дыйкан чарбалары салыктык башкарууну жакшыртуусу үчүн “Фермер кабинети” тиркемеси түрүндөгү санариптик платформаны иштеп чыгуу зарылчылыгы жөнүндө макулдашылды.