Европа Биримдиги Кыргызстан үчүн 2021-2027-жылдарга карата жаңы көп жылдык индикативдик программаны кабыл алды. Ал Кыргызстандын 2040-жылга чейин өнүктүрүүнүн Улуттук стратегиясында белгиленген максаттарга жана милдеттерге, Евробиримдиктин Борбордук Азия боюнча стратегиясына жана туруктуу өнүгүү максаттарына толугу менен шайкеш келет.

Евробиримдик 2024-жылга чейинки программасынын алкагында кантип башкаруу жана санариптештирүү, адамдык өнүгүү, жашыл жана климатка туруктуу экономика сыяктуу багыттардагы долбоорлорду каржылоого грант бөлөт.

“Башкаруу жана санариптештирүү маселелери боюнча мыйзамдуулукту, акыйкат башкарууну жана санариптик трансформацияны илгерилетүү жана бекемдөөгө артыкчылык берилет. Адамдык өнүгүү чөйрөсүндө инклюзивдик жана сапаттуу билим берүү системасын колдоо, ошондой эле гендердик теңчиликти жана адам укуктарын илгерилетүү пландаштырылууда. Жашыл жана климатка туруктуу экономика багытында суу ресурстарын эффективдүү жана комплекстүү башкаруу жана жашыл бизнести өнүктүрүүнү стимулдаштыруу маселелери жылдырылат”, - деп билдиришти Тышкы иштер министрлигинен.

Мындан тышкары, ЕБ билим берүү секторун реформалоо үчүн жаңы бюджеттик жардам программасы үчүн зарыл болгон максаттары менен алдын ала макулдашылган матрицаны сунуштады, аны бекитүү 2022-жылга пландаштырылган.

Эки тараптуу программа аймактык кызматташтыкты колдоо ресурстары жана ERASMUS+ жогорку билим берүү программасы, сооданы өнүктүрүү, коопсуздук жана илимий кызматташуу сыяктуу приоритеттүү тематикалык маселелер менен толукталат.