Башкы прокуратуранын жумушу инвесторлорго жана ишкерлерди коргоого багытталат. Бул тууралуу президент Садыр Жапаров бүгүн ишкер чөйрө менен жолукканда билдиргени маалым болду. 

Буга байланыштуу Башкы прокуратурага атайын жана тиешелүү чечимдерди тез арада даярдап чыгуу тапшырмасы берилди. Министрлер кабинетинин төрагасына жана Башкы прокурорго бул иш-чараны тезирээк жүзөгө ашыруу тапшырылды.

Мындан тышкары, президент алдыга дагы бир маанилүү кадам - ​​бул соода-өнөр жай палатасын түп-тамырынан бери реформалоо экендигин белгиледи. Бул уюм министрлер кабинети менен биргеликте ишкерлердин кызыкчылыгын коргоп, эл аралык ишкерлер менен байланышты чыңдап, аларга ыңгайлуу шарт түзүп бериши керек болчу.

"Уюм өзүнүн потенциалын колдонуп, өз миссиясын аткара албай жатат. Ушул уюмдун ишин өркүндөтүү үчүн Жапония менен Түркиянын моделине көңүлүңүздөрдү бургум келет. Инвестициялар министрлигине бир айдын ичинде Соода-өнөр жай палатасын реформалоо боюнча чечимдерди даярдоо тапшырылды. Ошондой эле, эркин экономикалык айматардын концепциясын түп тамырынан бери карап чыгуу керек. Бул маселе көп жылдардан бери көтөрүлүп келе жатат, бирок чечилбей келет. Менин оюмча, буга убакыт жетти", - деди Садыр Жапаров.

Президент өз сөзүндө өзгөчө бийликтин бардык бутактарынын, мамлекеттик түзүмдөрдүн башчыларынын, өзгөчө укук коргоо жана фискалдык органдардын көңүлүн жеке секторго болгон мамилени өзгөртүүгө бурду.