Тышкы иштер министрлиги Бириккен Араб Эмираттарынын Өнөр жай жана алдыңкы технологиялар министрлигине кайра жаралуучу энергия булактары, айыл чарба, туризм, жашыл технологияларды өнүктүрүү жана логистика боюнча долбоорлордун пакетин тапшырды. Бул тууралуу мекеменин басма сөз кызматы билдирди.

БУУнун Башкы ассамблеясынын 76-сессиясында тышкы иштер министри Руслан Казакбаевдин БАЭнин өнөр жай жана алдыңкы технологиялар министри Султан Аль-Жабер менен жолугушуусу болду. Алар эки тараптуу жана көп тараптуу экономикалык кызматташтыкты кеңейтүү маселелерин талкуулашты.

Ошондой эле алар Кыргызстанда жашыл экономиканы өнүктүрүүдө биргелешкен инвестициялык долбоорлорду ишке ашыруу мүмкүнчүлүктөрүнө токтолушту. Эл аралык уюмдардын алкагында өз ара колдоо көрсөтүү маселелерине өзгөчө көңүл бурулду.