Баткен облусунун чек арачылары 21 жана 22-сентябрда чек арадан мыйзамсыз контрабандалык товар ташууну токтотту. Бул тууралуу Чек ара кызматынын коомчулук жана ЖМК менен байланыш бөлүмү билдирди.

Баткен облусунун Лейлек районунун Кичи-Бел Сынык капчыгайында чек арачылар Кыргызстандын жарандары С.Г. жана К.А. башкаруусундагы "Мерседес-Бенц Спринтер" үлгүсүндөгү унааны кармашкан.

Унааны текшерүү учурунда уруксат кагаздары жок төрт тонна жүзүм табылган. Айдоочулар Тажикстандан Кыргызстанга мыйзамсыз жүк ташууга аракет кылышкан.

Ошондой эле Баткен облусунун Кадамжай районунун Жаңы-Жер тилкесиндеги мамлекеттик чек аранын кыргыз-өзбек тилкесинде Айдаркен чек ара отрядынын чек арачылары Кыргызстандын 1994-жылы туулган жаранын кармашкан. Айдоочу өткөрмө бекеттин сыртында идиштерди Өзбекстандан Кыргызстанга мыйзамсыз алып өтүүгө аракет кылган. Ошол эле учурда жүк ташуучунун жүктү ташууга уруксат кагаздары жок болгон.

Протоколдор түзүлгөндөн кийин кармалган айдоочулар жана жүктөр кошумча иликтөө үчүн орган кызматкерлерине өткөрүлүп берилди.