Быйыл тогуз айда Кыргызстанга акча которуу системалары аркылуу келген акчанын таза агымы 210 миллион долларга кыскарып, 1,4 миллиард долларды түздү. Бул тууралуу Евразия өнүктүрүү банкынын апталык макроэкономикалык баядамасында айтылат.  

Кыргызстандан жөнөтүлгөн каражаттардын көлөмү эки эсеге көбөйүп, 779 миллион долларды түздү. Анын ичинен Орусияга 680 миллион доллар (2021-жылдын январь-сентябрь айларында 376,2 миллион доллар), АКШга 4,4 миллион доллар (0,01 миллион доллар), Германияга 1,5 миллион доллар (0,15 миллион доллар) жөнөтүлгөн. 

Өлкөгө келип түшкөн акча которуулардын көлөмү өткөн жылга салыштырмалуу 8,8%га көбөйүп, 2,2 млрд долларды түздү. Акча которуу системалары аркылуу каражат эң көп Орусиядан келүүдө (дүң агымдын 97,5%). Ошондой эле, КМШдан тышкаркы өлкөлөрдөн келген түшүүлөр 2,2 эсеге өскөн.