Эмгек, социалдык коргоо жана миграция министрлиги эми Кыргызстандын бардык аймагында социалдык келишимдин негизинде социалдык жардам көрсөтөт. Бул тууралуу ведомстводон билдиришти.

Буга чейин долбоор өлкөнүн эки облуста гана пилоттук режимде ишке киргизилген.

Калкты жакырчылыктан чыгаруу долбоорунун алкагында, аз камсыз болгон үй-бүлөлөр “Үй-бүлөгө көмөк” жөлөкпулун алып, киреше алып келүүчү бизнести түзүү үчүн 100 миң сомдон ала алышат.

“Биринчи этапта министрликтин аймактык бөлүмдөрүнүн кызматкерлерине, жергиликтүү мамлекеттик администрациялардын, ошондой эле жергиликтүү өз алдынча башкаруу органдарынын жетекчилерине жана адистерине социалдык контракттын шарттарын жана механизмдерин түшүндүрүү боюнча окуу уюштурулду. Жалпысынан республика боюнча миңден ашык адам окуду”, - деп айтылат Эмгек министрлигинин маалыматында.