Сооронбай Жээнбеков кол койгон Жарлыкка ылайык, Бишкек шаарынын аймагына кайрадан өзгөчө абал режими киргизилди. Бул тууралуу президенттин басма сөз кызматы кабарлады.
Белгилүү болгондой, мындай чечим Жогорку Кеңеш үч күндүн ичинде борбор калаанын аймагында буга чейин өзгөчө абал режимин киргизүү жөнүндө маселени карабагандыгы менен негизделген. Ага ылайык, Бишкек шаарынын аймагында 2020-жылдын 12-октябрынан саат 20.00дөн баштап 2020-жылдын 19-октябрына саат 07.00гө чейин өзгөчө абал киргизилди. Бул учурда жөө адамдардын, коомдук транспорттун жана жеке унаалардын да көчөдө жүрүшүнө тыюу салынат. Бишкекте күндүз жөө жүрүш, пикет, митинг, спорттук жана маданий иш-чараларды өткөрүүгө болбойт.
Ал эми ички иштер министринин орун басары Алмазбек Орозалиев Бишкек шаарынын коменданты болуп дайындалды.
Тиешелүү жарлык Жогорку Кеңеш кол койгон күндөн тарта күчүнө кирет.
Материалды башка сайтка көчүрүү, “редакциянын уруксаты жана маалымат “булагынын” гипершилтемесине таянуу менен жасалууга тийиш
