Ноябрь айына республикалык бюджеттин жалпы ресурстары 31 миллиард 844 миллион 134,2 миң сом өлчөмүндө пландаштырылган. Бул тууралуу Каржы министрлигинин ушул айга кассалык пландаштыруунун максималдуу суммасы боюнча документинде жазылды.

Салт боюнча бюджетке каражаттын басымдуу бөлүгү салык төлөмдөрүнөн түшөт, ал план боюнча 12 миллиард 95 миллион 199,6 миң сом болушу керек. Анын 7 миллиард 544 миллион 49,6 миң сомун жыйноо Мамлекеттик салык кызматына, дагы 4 миллиард 551 миллион 150 миң сому Мамлекеттик бажы кызматына жүктөлгөн.

Ошол эле учурда экономиканы диверсификациялоону колдоо программасынын алкагында бюджетке Азия өнүктүрүү банкынан да 5 миллиард 890,5 миллион сом өлчөмүндө колдоо көрсөтүлөт. Ушул эле программанын алкагында АӨБдөн расмий трансферт түрүндө казынага 909,5 млн сом түшөт.