Бекешев Соцфонддун кызматкерлерин кыскартууну сунуштады

Жогорку Кеңештин жыйынында депутат Дастан Бекешев Социалдык фонддун төрагасы Бактияр Алиевге кайрылып, Соцфонддун административдик чыгымдары буга чейин миллиард сомдон ашып кеткендиктен, кызматкерлердин санын кыскартууну суранды.

Депутаттын айтымында, Эсеп палатасы да Социалдык фонддун жетекчилигинин бири-бирин кайталаган функциялары бар экенин билдирүүдө.

“Бир кызматкер 1,5 миң пенсионерди тейлеши керек, бирок учурда бир кызматкерге 4-5 миң пенсионер туура келет. Ал эми кээ бир аймактарда Социалдык фонддун бир кызматкери жети миңге чейин пенсионерди тейлейт”, - деп жооп берди Алиев депутатка.

Социалдык фонддун төрагасынын айтымында, кызматкерлерди кыскартуу санариптештирилгенден кийин гана мүмкүн.