Дан азыктарын аткезчилик жол менен ташып чыгууга бөгөт коюлду

Кыргызстандан Өзбекстанга дан азыктарын аткезчилик жол менен ташууга бөгөт коюлду. Бул тууралуу Баткен облустук милициясынын басма сөз кызматы билдирди.

Маалыматка ылайык, милиция кызматкерлери Кадамжай районунун Көтөрмө айыл аймагында 2 жүк ташуучу унаа токтотулган.

"Текшерүү иштеринин жүрүшүндө Кара-Суу районунун тургундарынын башкаруусунда келе жаткан бул унаалардагы дан азыктары Өзбекстандын Риштан районунун Шахимардан анклавына аткезчилик жол менен бара жаткандыгы белгилүү болуп, кармалды", - деп айтылат маалыматта.

Бул факты атайын каттоого алынып, кармалган унаалар атайын токтотулуучу жайга киргизилип, учурда тергөө иштери жүрүп жатканы белгиленген.