Жээнбеков: элдин жашоосу оңолмоюнча «подкуп» боло берет

Шайлоодо добуш сатып алуулар элдин жашоосу оңолмоюнча боло берээрин президент Сооронбай Жээнбеков «Би-Би-Си» радиосуна берген маегине билдирди. Ал кошумчалагандай, соңку учурда ушул маселенин үстүндө иштеп жаткан.

«Подкуп маселеси биздин элдин социалдык-экономикалык абалынын начардыгынан. Мына ошону оңдомоюнча өлкөдө подкуп боло берет. Менин негизги иштеп аткан максаттарым азыркы Конституциянын алкагында чектелген укуктарыма карабай, ишимдин көпчүлүк убактысын ошол социадык-экономикалык абалды оңдоого жумшаган болчумун», - деп билдирди президент.

Жээнбеков өз сөзүндө ЕККУнун байкоочулары менен жолугушууда да шайлоодо добуш сатып алуу негизги маселе катары белгиленгенин жашырган жок.

Кыргызстанда 4-октябрда парламенттик шайлоо өткөн. Бирок анын жыйынтыгына нааразы партиялардын тарапташтары шайлоонун эртеси митингге чыгып, нааразычылык акция жер-жерлерде башаламандык менен коштолгон. Учурда шайлоонун жыйынтыгы жокко чыгарылды.

Өлкөдө өкмөт башчы, Жогорку Кеңештин төрагасы баштаган бир топ аткаминерлер кызматтан кетүү тууралуу арыз жазышты.