Калктын аярлуу катмарына 9,6 млн сомго көчөттөр берилди

Орто мөөнөттүү келечекте кирешенин альтернативдүү булактарын түзүү жана коронавирустук инфекциянын жайылышына байланыштуу кризистин кесепеттерин жоюу үчүн калктын социалдык жактан аялуу катмарына 9,6 млн сомго жалпысынан 163 миң 804 даана мөмө-жемиш дарактарынын көчөттөрү берилди.

Айыл чарба министрлигин басма сөз кызматы маалымдагандай, COVID-19 пандемиясынын шартында калктын социалдык аялуу катмарын колдоо программасынын алкагында мөмө-жемиш көчөттөрүн жеткирүү аяктады.

Баткен, Талас, Ат-Башы, Нарын жана Аксуу райондорунун 31 айыл өкмөттөрүнө 115 428 даана алманын жана карагаттын көчөттөрү жеткирилди.

Былтыр күзүндө Токтогул, Аксы, Ноокен, Кара-Кулжа, Тоң, Ысык-Көл райондорунун жана Балыкчы шаарынын 30 айыл өкмөтүнө 48 миң 373 түп алма жана өрүк көчөттөрү алынып келинген.

Белгилей кетсек, 13 пилоттук токой чарбаларынын аймагына чектеш 61 айыл өкмөттө жашаган 7 мин 717 аялуу үй-чарбаларга көчөт материалдары тапшырылды. Үй-чарбалардын тизмеси айыл өкмөттөр тарабынан берилген. Орточо эсеп менен ар бир үй-чарбага 15тен, Баткен районунун үй-чарбаларына 59дан көчөт берилет.