Түркстандагы бир нече айылды каптаган селдин чыгымы 950 миң доллардан ашты

Өзбекстандагы Сардаба суу сактагычында дамба жырылгандан кийин Казакстандын Түркстан облусундагы он айылды суу каптап, 22 миңден ашык жергиликтүү тургун коопсуз жерге эвакуацияланды.

Казакстандын президенти Касым-Жомарт Токаев «Твиттердеги» баракчасына жабыркаган тургундарга жардам берилип, өзбек өкмөтү менен сүйлөшүүлөр жүрүп жатканын жазды.

2-майга караган түнү Түркстан облусундагы бир нече айылды суу каптагандан кийин аймактагы Мактаарал районунда техногендик мүнөздөгү өзгөчө кырдаал жарыяланган.

Жекшемби күнү облустук акимчилик аталган райондо 620 турак үйдү жана 3,5 миң гектардан ашык айдоо жерди суу каптап, жалпысынан 404 миллион теңге (950 миң доллардан ашык) материалдык чыгым келтирилгенин билдирди.