Соцфонд баалуу кагаздарга 13 млрд сомдон ашык инвестиция салды

18 декабря 2023, 11:42

Январь-ноябрь айларында Социалдык фонд Мамлекеттик пенсиялык топтоо фондунан (МПФ) баалуу кагаздарга жана коммерциялык банктарга 13 млрд 40 млн 188,8 миң сом инвестициялады.

Фонддо белгиленгендей, бул каражаттардын 7 млрд 459 млн 597 миң сому мамлекеттик баалуу кагаздарга (МБ) жылдык 16-16,55% чегинде инвестицияланган.

Мамлекеттик пенсиялык фондддун каражаттарынын бир бөлүгү 5 млрд 580 млн 591,8 миң сом суммасында коммерциялык банктардын депозиттерине жайгаштырылган, жайгаштыруу мөөнөтү 12 ай, 18 ай, жылдык кирешелүүлүгү 13-16,5% болгон.

Жалпысынан 2023-жылдын январь-ноябрь айларында Мамлекеттик пенсиялык фонддун каражаттарын инвестициялоодон 3 млрд 873 млн 317,5 миң сом киреше алынган.