Россия Федерациясынан келишимдик негизде сатып алынган буудайдын экинчи партиясы Кыргызстандын аймагына жеткирилди. Бул тууралуу өкмөттүн басма сөз кызматы билдирет.

Кыргызстанга донор-өлкөлөрдөн келген гумжардамдын тизмеси

Маалыматка ылайык, бул жолу 11 вагон – 760 тонна дан эгини алынып келинди. Жакынкы күндөрү өлкө аймагына дагы 53 вагон буудай жеткирилет.

Белгилей кетсек, буга чейин өкмөткө караштуу Мамлекеттик материалдык резервдер фонду Россия Федерациясындагы азык-түлүк корпорациясы менен 33 миң тонна буудай сатып алуу боюнча келишимге кол койгон. Бүгүнкү күндө анын 1800 тоннага жакыны келди.

Өкмөт тарабынан азык-түлүк коопсуздугун камсыз кылуу максатында сатып алынган буудайдын курамындагы белоктун көрсөткүчү жогору.

Өкмөткө караштуу мамлекеттик материалдык резервдер фондунун кампаларында ун менен буудайдын кору жетиштүү. Өлкөдө ун жана дан азыктарына болгон таңкыстык жок.