Быйылкы жылы кыргыз-орус өнүктүрүү фонду 165 миллион долларлык 44 долбоорду жактырган. Бул фонддун тарыхындагы рекорддук көрсөткүч. Бул тууралуу анын жетекчиси Артем Новиков билдирди.

Эгер 2021-жылдын январында фонддун активдүү түз каржылоо портфелинде 71 долбоор болсо, бүгүнкү күндө 106 долбоор каржыланды, дагы бир нечеси иш кагаздарын жүргүзүү жана инвестициялоо баскычында турат.

Артем Новиковдун айтымында, жалпысынан фонд иштеп жаткан мезгилде 470 миллион доллардан ашык суммага 3 миң 280 долбоор каржыланган.

"Биз фонддун 500 миллион доллар өлчөмүндөгү уставдык капиталын дээрлик толугу менен жайгаштыра алдык, анын 200 миллион доллардан ашыгы фондго кайтарылды", - деп белгиледи Новиков.

Фонддун жетекчиси аларда келечекте долбоорлорду каржылоого жетиштүү каражат бар экенин кошумчалады. Алсак, 2023-жылга портфелде 130 миллион доллардан ашык каражатты талап кылган 29 каржылоо өтүнмөлөрү бар.

"Быйыл биз үчүн долбоорлорду жактыруу көрсөткүчтөрү боюнча гана эмес, алардын көлөмү боюнча да рекорддук жыл болду. 2022-жылы биз биринчи жолу 35 миллион долларлык эң ири долбоорду каржыладык, анын ичинен фонд аны ишке ашырууга 25 миллион доллар бөлдү. Мындан тышкары, 45 миллион долларлык долбоорду бекиттик", - деди Артем Новиков.

Белгилеп кетсек, фонд ишкердиктин бардык чөйрөлөрүн камтыйт. Долбоорлордун басымдуу бөлүгү өнөр жай, өндүрүш, өнөр жай материалдары жана агроөнөр жайга багытталган. Бул тармактардын үлүшү фонддун жалпы портфелинин 60%ын түзөт.