Кыргызстанда эт азыктарынын курамында антибиотиктер жана башка зыяндуу заттарды текшере турган эл аралык деңгээлдеги эки лаборатория бар. Бул тууралуу Ветеринардык кызматтын директорунун орун басары Чыңгыз Шейшенбаев маалымат жыйынында билдирди. 

Чыңгыз Шейшенбаев жарандарды мал союучу жайлардагы мыйзам бузууларды билдирүүгө чакырды.

Аталган кызматтын маалыматы боюнча, өлкөдө 93 мал союучу цех бар. Текшерүүнүн жыйынтыгы боюнча 25 мал союучу жай мыйзам бузгандыгы аныкталган. Талапка ылайык, алар бир айдын ичинде аныкталган мыйзам бузууларын жоюшу зарыл. 

“Көпчүлүк цехтер ветеринардык-санитардык эреже бузуулардан, лицензиянын жоктугунан жана тиешелүү талаптарга жооп бербегендиктен жабылган. Эч кандай документи жок эттин курамында антибиотиктер болгон фактылар да бар”, - дейт Ветеринардык кызматтын өкүлү Тилек Табалдиев.

Ошол эле учурда, кызматтын маалыматы боюнча 8 мал союучу жай эл аралык стандарттарга жооп берет. Эт азыктары Кувейт, Бириккен Араб Эмираттары жана Орусияга экспорттолот.