Чүй облусунда пневмонияны дарылоо үчүн 498 койко-орун бар, буга кошумча дагы 404 койко-орунду даярдоо пландалууда. Бул тууралуу Республикалык штабдан билдиришти. 
 

Тышкы донорлордон дагы 116.2 млн доллар каражат келүүсү күтүлүүдө

«Бүгүнкү күндө, Чүй облусунда 12 саламаттык сактоо мекемесинде коронавирус инфекциясын жана пневмонияны дарылоо жүрүп жатат. Алардын ичинен, 4 ооруканада 109 койка-орун даярдалып, учурда 83 бейтап жаткырылган. Жарандарга тез жана ыкчам түрдө алгачкы жардамды берүү үчүн ар бир оорукананын алдында стационардык палатка пункттары даярдалган», - деп билдирди КР Өкмөтүнүн Чүй облусундагы ыйгарым укуктуу өкүлүнүн аппаратынын жетекчиси Гульнура Мамбетисаева.
 

Анын айтымында, пневмония дартынын күч алышына байланыштуу 8 саламаттык сактоо мекемесинде 498 койко-орун даярдалган. 3-июлга карата маалыматка ылайык, жалпы 462 бейтап жаткырылган.
 

«Кошумча койко-орундуктарды даярдоо боюнча активдүү иш жүрүп жатат. Медициналык пероналды зарыл болгон медициналык жабдуулар менен камсыздап, шарттарды түзүү боюнча иштеп жатабыз. Жакын арада, дагы кошумча 404 койко-орун даярдалат», - деп кошумчалады.