"Баркад" облигациялардын биринчи чыгарылышы боюнча пайыздык кирешенин төлөнүшү тууралуу билдирди. Бул тууралуу маалымат Кыргыз фондулук биржасынын сайтында жарыяланды.

Ошентип, компания биринчи чыгарылыштын алкагында жайгаштырылган облигациялар боюнча 3,6 миллион сом пайыздык кирешени чегерген. Бүгүнкү күндө “Баркад” 173 баалуу кагаз кармоочуга 3 миллион 394 миң 320 сом төлөп берди. Калган сумма да 46 баалуу кагаз ээлеринин каалоосу боюнча бөлүштүрүлөт.

Кошумчалай кетсек, бул компаниянын биринчи эмиссиясынын алкагында облигациялардын кирешелүүлүгүнүн төртүнчү төлөмү. Бардыгы болуп "Баркад" кирешени төлөө үчүн 11 376 980 сом бөлүп берген.

Эске салсак, "Баркад" компаниясы биринчи жолу 2020-жылдын октябрь айында 90 миллион сомго корпоративдик облигацияларды чыгаруу менен фондулук рынокко чыккан. Компаниянын баалуу кагаздары дароо бааланып, Blue Chips категориясы боюнча Кыргыз фондулук биржасынын расмий тизмесине киргизилген.