Кыргызстан "Европа бирлиги - Борбордук Азия" биринчи экономикалык форумун өткөрүүгө даярданууда. Бельгия, Нидерландия жана Люксембургдагы элчи Муктар Жумалиев мамлекет башчысына даярдыктын жүрүшү тууралуу айтып берди.

Анын айтымында, экономикалык форум Европа бирлиги жана Борбор Азия үчүн жаңы экономикалык аянтчага айланат. Евробиримдиктин делегациясынын сапары бизнести өнүктүрүүгө оң түрткү берет жана инвестициялык климатты жакшыртат.

"Иш-чара премьер-министрлердин деңгээлинде өтөт. Европа Биримдиги Евробиримдиктин жашыл экономикалык өнүгүүгө өтүү стратегиясын ишке ашыруу үчүн 1 триллион евродон ашык каражат бөлгөнүн жарыялады. Буга байланыштуу кыргыз тарап келе жаткан форумдун алкагында ЕБ менен кызматташуу үчүн өзүнүн туруктуу экономикалык долбоорлорун сунуштай алат”, - деди дипломат.

Муктар Жумалиев ошондой эле форумда жашыл экономиканы калыбына келтирүү, бизнес чөйрөнү жакшыртуу, санариптештирүү сыяктуу темаларга арналган сессиялар жана жеке иш-чаралар өткөрүлөрүн, ошондой эле энергетика, финансы, туризм жана башка тармактарда параллелдүү сессиялар өткөрүлөрүн айтты.