ЕАЭБ менен Кытайдын соода-экономикалык кызматташуусу боюнча жыйын өттү. Анда былтыр ЕАЭБ менен Кытайдын ортосундагы соода жүгүртүү 200 миллиард доллардан ашкандыгы айтылды. Бул тууралуу тийешелүү мекемеден билдиришти. 

ЕАЭБ менен Кытайдын соода-экономикалык кызматташуусу боюнча өткөн комиссиянын үчүнчү отурумунда техникалык жөнгө салуу, санитардык жана фитосанитардык чараларды колдонуу, бажы кызматташтыгы, атаандаштык жана рынокту коргоо чаралары талкууланды. Жыйынга Евразия экономикалык комиссиясынын соода министри Андрей Слепнев жана Кытайдын Коммерция министринин орун басары Ли Фэй катышты. 

Отурумда ЕАЭБ жана ага мүчө мамлекеттердин, Кытайдын ортосундагы соода-экономикалык кызматташтыкты өнүктүрүүнүн жол картасы, анын ичинде тармактагы иш-чаралар бекитилген. Мындан тышкары, темир жол транспортун санариптештирүү, стратегиялык пландаштыруу боюнча маалымат алмашуу жана кызматташтыкты өнүктүрүү перспективалары, биргелешкен илимий изилдөө иштери пландалды. 

“Биз темир жол аркылуу ЕАЭБден Кытайга азык-түлүк товарларын ылдам жеткирүүнү ишке ашырууга багытталган “Евразиялык Агроэкспресс” долбоорун өнүктүрүүгө көмөк көрсөтүүнү улантууга макулдаштык. Долбоор ЕАЭБге мүчө мамлекеттерден келген товарлардын ассортиментин диверсификациялоо жана 2022-жылы 200 миллиард доллардан ашкан Кытай менен сооданы көбөйтүүдө өзгөчө мааниге ээ”, - деди Андрей Слепнев жолугушуудан кийин.