Жогорку Кеңештин жыйынында депутат Дастан Бекешев Министрлер кабинетинин өкүлү Алмазбек Абытовдон мүмкүнчүлүгү чектелген жарандардын көйгөйүнө көңүл буруп, алардын муктаждыктарына республикалык бюджеттен каражат бөлүүнү суранды. 

“Бүрсүгүнү, 3-декабрда майыптардын эл аралык күнү белгиленет. Тилекке каршы, биз аларга дагы эле жетиштүү көңүл бурбай жатабыз. Министрлер кабинети алардын жөлөк пулун көтөрүүдө. Бирок муну менен эле чектелбеш керек. Ушул убакка чейин бизде эски инфраструктура менен калган. Мыйзамда көрсөтүлгөнү менен инклюзивдик билим берүү жок. Репетиторлор жана фонддор аутист адамдар үчүн өтө кымбат баада сабактарды беришет. Реабилитациялык борборлор жок. Угуусу начар жарандардын жогорку билимге мүмкүнчүлүгү жок. Министрлер кабинети сурдокотормочулардын кызматына мыйзамда каралганына карабай акча төлөбөйт. Азырынча кыргыз жаңдоо тили жок. Министрлер кабинети бул жолу жок дегенде угуп, 2023-жылдын бюджетинен майыптар үчүн бир аз каражат бөлүп берет деп ишенем”, - деди Бекешев.