Банк секторуна, атап айтканда Visa жана MasterCard системалары аркылуу акча которууларга киргизилген чектөөлөр биздин аймакта криптовалютанын өнүгүшүнө олуттуу түрткү берди. Бул тууралуу ушул күндөрү "Атакент" Казакстандын Ишкер Кызматташтык Борборунун аянтында өтүп жаткан "Санариптик Алматы 2023: Жаңы реалдуулукта санариптик өнөктөштүк" форумунун алкагында министрлер кабинетинин төрагасы Акылбек Жапаров билдирди.

Анын айтымында, жасалма интеллект мүмкүнчүлүктөрдү да, чакырыктарды да алып келет, ошондуктан анын коомго тийгизген таасирин активдүү башкаруу зарыл.

"Банк секторуна киргизилген чектөөлөр (Visa жана MasterCard системалары аркылуу акча которуулар) биздин аймакта криптовалютанын өнүгүшүнө олуттуу түрткү бергени жашыруун эмес. Эксперттердин баамында, Бишкек шаарында гана көмүскө жүгүртүүнүн көлөмү күн сайын 5 миллион доллардан 10 миллион долларга чейин жетет", — деди министрлер кабинетинин төрагасы.

Акылбек Жапаров кошумчалагандай, криптовалюта өлкөнүн экономикалык өнүгүүсүнө оң да, терс да таасирин тийгизет.

"Криптовалюталардын өлкөнүн экономикасына тийгизген таасири ар кандай факторлорго, анын ичинде өлкөнүн жөнгө салууга болгон мамилесине жана жарандар менен бизнестин криптовалюталарды кабыл алуу деңгээлине жараша болот. Бул технологиялардын потенциалы таасирдүү, бирок бир катар себептерден улам аларга этияттык менен мамиле кылуу керек. Жасалма интеллектке негизделген жаңы технология рынокко кирерден мурун жөнгө салуу маселелери чечилиши керек", - деп белгиледи Жапаров.