Мамлекеттик салык кызматынын кызматкерлери Бишкек жана Токмок шаарларында рейд учурунда жасалма тамеки сатуучу жайларды аныкташты. Бул тууралуу аталган мекеменин басма сөз кызматы билдирди. 

Иш-чаранын жыйынтыгында ар кандай аталыштагы чет элдик өндүрүштүн акциздик маркасы жок 3 миң кутудан ашык тамеки табылган. 

Ишкерлерге карата Кыргызстандын мыйзамдарына ылайык тийиштүү чаралар көрүлөт.

Жалпысынан 11 ай ичинде Мамлекеттик салык кызматы 228 миң 312 куту мыйзамсыз тамекини жүгүртүүдөн чыгарган.

Кошумчалай кетсек, акциздик маркалары жок тамеки буюмдарын өндүрүү, ташып келүү жана сатуу, ошондой эле акциздик маркаларды жасалмалоо боюнча жеке жактарга 20 миң сом, юридикалык жактарга 65 миң сом өлчөмүндө айып салынат.

Ошол эле учурда, ири өлчөмдө жасалган мыйзам бузууларга 100 миң сомдон 200 миң сомго чейин айып салынат же, беш жылга чейин эркинен ажыратылат.