“Чалдыбар-автодорожный” өткөрүү пунктунан 211 миң кутудан ашык аткезчилик тамеки табылды. Бул тууралуу Улуттук коопсуздук боюнча мамлекеттик комитеттин басма сөз кызматы билдирди.
Сотко чейинки өндүрүш материалдарынын алкагында 2022-жылдын 24-августунда Кыргыз Республикасынан чыгып баратканда тамеки буюмдарын мыйзамсыз ташып бара жаткан жүк ташуучу унаа кармалган. Алар тоңдурулган азык-түлүккө жамынып алып, контрабандалык жол менен товарды алып өтүүгө аракет кылышкан. Тийиштүү уруксат кагаздары жок 211 миң таңгак тамеки ташылган.
“Алдын ала маалыматтар боюнча, кармалган контрабандалык товардын баасы 21 миллион сомдон ашык, ал эми салык төлөмдөрүнүн суммасы 9 миллион 495 миң сомду түздү”, — деп айтылат УКМКнын маалыматында.
Учурда акциздик товарларды экспорттоо боюнча мыйзамсыз канал уюштурган адамдарды аныктоо, ошондой эле аныкталган зыяндын ордун толтуруу боюнча тергөө-ыкчам иш-чаралары жүргүзүлүүдө.