Министрлер кабинети тарабынан Саламаттык сактоо министрлигине караштуу "Кыргызфармация" мамлекеттик ишканасы түзүлдү. Тиешелүү чечим ведомствонун сайтында жарыяланды.

Ишкана мамлекеттик ооруканаларды жана калкты жеткиликтүү баада дары-дармек жана медициналык буюмдар менен камсыздоонун жаңы ыкмасын ишке ашыруу максатында түзүлгөн.

Буга байланыштуу Финансы министрлигине “Кыргызфармация” мамлекеттик ишканасына 2023-жылы 500 миллион сом өлчөмүндө бюджеттик насыя бөлүп берүү жана келерки жылы да ушундай көлөмдөгү каражатты кароо тапшырмасы берилди. Мындан тышкары ишкананын кызматкерлерине эмгек акы төлөө фондусу 30 миллион сомду түзөт.

Мамлекеттик мүлктү башкаруу фондуна Саламаттык сактоо министрлиги менен бирдикте ишкананы акысыз пайдалануу келишиминин шарттарында кампа менен камсыз кылуу тапшырылды.

Саламаттык сактоо министрлиги өз кезегинде жаңы ишкананы Юстиция министрлигинен каттоодон өткөрүп, ошондой эле тиешелүү лицензияларды бериши керек.