Кыргызстан ислам банк тутумунун колдонулган инструменттеринин санын көбөйтүүнү пландаштырууда. Бул тууралуу Бишкекте өтүп жаткан Ислам бизнеси жана инвестиция форумунда сүйлөп жатып министрлер кабинетинин төрагасынын орун басары Бакыт Төрөбаев билдирди.

Ал белгилегендей, быйыл Кыргызстанда 2023-2027-жылдарга Ислам экономикалык платформасын өнүктүрүү концепциясын бекитүү пландалууда.

"Документ исламдык баалуу кагаздарды, исламдык камсыздандырууну, ошондой эле халал продукциясын өндүрүүчүлөрдүн исламдык инвестицияларга жана исламдык каржылоого жеткиликтүүлүгүн камсыз кылууну камтыйт", - деди Төрөбаев.

Ал ошондой эле ислам инвестициясынын аркасында ири долбоорлор ишке ашарына ишенимин билдирди.