Бир күн мурун "Кумтөр" кениндеги алтындын биринчи партиясы Кыргызстандын Улуттук банкына сатылды. Келишим 29 миллион долларды түздү. Бул тууралуу "Кумтөр Голд Компанинин" тышкы менеджери Тенгиз Бөлтүрүк бүгүн, 20-майда маалымат жыйынында билдирди.

Анын айтымында, жакынкы күндөрү бул каражат компаниянын эсебине келип түшөт, бул ишкананын толук кандуу ыкчам ишин улантууга мүмкүнчүлүк берет.

"Бүгүнкү күндө "Кумтөр Голд Компани" ЖАКтын бардык эсептери тоңдурулган жана республиканын чегинен тышкары жерлерде. Кыргыз Республикасынын жергиликтүү банктарында ачылган депозиттерде аз гана сумма топтолот. Алар бизге иштөөгө мүмкүнчүлүк беришпейт. Биз кенди иштетүү үчүн керектүү товарларды жана кызматтарды сатып алууга гана айына 21 миллион доллар сарптайбыз, дагы 4 миллион доллар эмгек акы төлөө үчүн, 11 миллион доллар салыктарга жумшалат”, - деп түшүндүрдү Тенгиз Бөлтүрүк.

Ушуга байланыштуу, компаниянын тышкы жетекчилиги "Кумтөр Голд Компанинин" жана "Кумтөр" кенинин ишин каржылоо булактарын табуу боюнча чараларды көрдү. Тактап айтканда, Улуттук банкка алтын сатуу боюнча келишим түзүлдү.

"Бул бизге 29 миллион доллар табууга мүмкүнчүлүк берди. Дагы 20 миллион доллар - бул "Кумтөр Голд Компанинин" дивиденддери, биз аларды өндүрүшкө жөнөтөбүз. Биз Экономика жана Финансы министрлиги менен 25 миллион доллар өлчөмүндө кайтарымдуу насыя берүү боюнча сүйлөшүүлөрдү жүргүзүп жатабыз. Бул акча кендин ишин толук кандуу калыбына келтирүүгө жетиштүү болот ”, - деп баса белгиледи ал.

Бөлтүрүк ишкананын каржы маселеси толугу менен калыбына келтирилгенден кийин, ал антикризистик чаралардын кийинки бөлүгүнө өтөөрүн, тактап айтканда, сатып алуулар процессинде ачык-айкындуулукту уюштуруу жана баалуу казып алуунун альтернативдүү (жабык) ыкмасын киргизүү менен чыгымдарды оптималдаштырууну кошумчалады.