10-январда Кыргызстандын Бириккен Араб Эмираттарындагы элчиси Абдилатиф Жумабаев Бириккен Араб Эмираттарынын Соода-өнөр жай палаталары федерациясынын башкармалыгынын төрагасы жана Абу-Даби Соода-өнөр жай палатасынын төрагасы Абдулах Мохамед Аль Мазруи менен жолугушту.
Жолугушууга КР Соода-өнөр жай палатасынын вице-президенти Эльмира Батаева катышты.
Сүйлөшүүнүн жүрүшүндө тараптар Кыргызстран менен БАЭнин ортосундагы соода-экономикалык жана инвестициялык кызматташуунун актуалдуу маселелерин талкуулашты.
“Кыргызстандын Соода-өнөр жай палатасы менен Бириккен Араб Эмираттарынын Соода-өнөр федерациясынын ортосунда Кыргыз-Эмират ишкерлер кеңешин түзүү боюнча өз ара түшүнүшүү жөнүндө кол коюлган Меморандумду ишке ашыруу боюнча маселелер каралды”,- деп айтылат Тышкы иштер министрлигинин маалыматтында.
Кошумчалай кетсек, жолугушуунун жүрүшүндө эки мамлекеттин ишкерлер чөйрөлөрүнүн катышуусундагы өз ара сапарларды уюштуруу боюнча пикир алмашуу болду.