Быйыл Кыргызстан өзүн картошка менен 100% камсыздай алат. Бул тууралуу Жогорку Кеңештин “Ата-Журт Кыргызстан” жана "Мекенчил" фракцияларынын жыйынында айыл чарба министри Аскарбек Жаныбеков билдирди.
Анын айтымында, бүгүнкү күндө 670 миң тонна кант кызылчасы жыйналып, эми кайра иштетилет. Ошентип, кант менен камсыздоо 82,7% түзөт.
Өлкө боюнча сүт азыктары менен камсыз болуу 100%дан ашууда.
"Эгерде биз мурда тамак-аштын үч түрү менен, анын ичинде эт жана кант менен 85% камсыз кылсак, быйыл эт жана кант менен 88% камсыз болдук. Бүгүнкү күндө биз өзүбүздү 9 негизги азык-түлүктүн бешөөсү менен толук камсыздай алабыз", - деди министр.
Ал белгилегендей, Чүй облусунда суунун тартыштыгынан жана кант кызылчасына, жүгөрүгө, малинага жана кулпунайга көбүрөөк жер бөлүнгөндүктөн көп жылдык өсүмдүктөрдү өндүрүү деңгээли төмөндөгөн.