Кечээ, 30-ноябрда Улуттук банк Башкармасы коммерциялык банктардын акча алмаштыруу жайлары менен чет өлкө валютасын сатып алуу-сатуу операцияларына коюлган чектөөлөрдү алып салуу боюнча токтом кабыл алды. Бул тууралуу жөнгө салуучу орган билдирди.

Валюта рыногундагы кырдаалды турукташтыруу максатында 2022-жылдын 22-июлунда Улуттук банк убактылуу чектөөлөр киргизген.

“Бул токтом менен Улуттук банк Башкармасынын “Валюталык операциялар чөйрөсүндөгү убактылуу чечимдер жөнүндө” токтому 2023-жылдын 1-мартына чейин токтотулат”, — деп айтылат көзөмөл органынын билдирүүсүндө.

Эске салсак, 5-сентябрдан тарта Улуттук банк 2022-жылдын 1-декабрына чейин тиешелүү чектөөлөрдү алып салган. Ошентип, бул токтом менен Улуттук банк Башкармасы өзгөртүүлөрдү ишке ашыруу мөөнөтүн үч айга узартты.