Бишкектеги курулуш компаниялар 80 ашык долбоорду жүзөгө ашыра албай келишет. Анын себеби, пландаштырылган документтердин жоктугу. Борбордогу курулуш бизнесиндеги маселелер тууралуу парламенттин депутаттарына «ЖИА Бизнес-ассоциациянын» өкүлдөрү айтып беришти. 

Ишкерлердин айтымында, курулуш иштерине байланышкан документтерди тезинен иштеп чыгуу - бул тармактагы жемкорлукту азайтат. Инженер-техникалык инфраструктурага кошуу курулушчулардын мойнунда деп билдиришти бирикменин өкүлдөрү. 

Депутат Тынчтыкбек Конушбаев: «Курулуш иштерине уруксат берүү жолу 97 иш күндөн ашпашы керек. Бирок, учурда ал 426 күндү же 1 жыл 2 ай убакытты алууда. Ошондуктан курулуш иштери 4-5 жылга чейин созулууда. Экономикалык эсеп менен алып караганда, эгерде курулуш 11 айдан көп жүргүзүлсө, анда  жоготуу башталат», — деп билдирди.