Бириккен Араб Эмиратындагы мекендерштерге элчиликтен 5 млн сом бөлүнгөн. Бул тууралуу ТИМ Чыңгыз Айдарбеков ЖК жыйынында депутат Алмазбек Батырбековдун суроолоруна жооп берип жатып билдирди.
«Өкмөт элчиликке 20 млн сом бөлүп берген. Анын ичинен 10 млн сом Орусиядагы мекендештерге, 5 млн сом БАЭдеги мекендештерге бөлүндү. Калган каражаттарды азыр кармап турабыз, кимге муктаж болсо бөлүп берүүгө даярбыз», - деп билдирди Чыңгыз Айдарбеков.
Депутат БАЭде канча мигрант бар экендигине кызыкты.
ТИМ: «БАЭде 3500 жараныбыз бар»
Эл өкүлү Орусия менен БАЭдеги мекендештердин санына карабай бөлүнгөн суммага таң калды.
«Орусияда 300-400 миң мигранттарыбыз бар. БАЭде болсо 3500 экен. Эки өлкөдөгү мекендештердин санынын айырмасы асман менен жердей болуп турат. Акча акыйкатсыз бөлүнүп калган жокпу? Мухаммедкалый Дүйшөкеевич, бул акчаларды дагы карашыңыз керек экен. БАЭде эмгек акынын саны дагы бир топ жогору. Муну дагы эске алуу керек эле», - деп билдирди депутат Алмазбек Батырбеков.
Эске сала кетсек, Орусиядагы мекендештерге элчилик тарабынан бөлүнгөн 10 млн сом учурда коротула электигин, Аликбек Жекшенкулов билдирген.
Материалды башка сайтка көчүрүү, “редакциянын уруксаты жана маалымат “булагынын” гипершилтемесине таянуу менен жасалууга тийиш
