Агроөнөр жай комплексин өнүктүрүү ассоциациясы чекене соода түйүндөрүнүн шарттарын катаалдаштырган ички соода мыйзамына түзөтүүлөрдү кабыл алууну жактайт. Өндүрүүчүлөр мыйзамга киргизилген өзгөртүүлөр өлкө экономикасына мультипликативдик эффект берип, жаңы фабрикалар жана ишканалар ачылып, бюджеттин кирешеси потенциалдуу түрдө 4,5 миллиард сомго чейин көбөйөт деп ишенишет.

"Ички соода жөнүндө" мыйзамга өзгөртүүлөр дүкөн текчелеринде товарларды жайгаштыруу үчүн товар берүүчүлөрдөн чекене соода түйүндөрүнүн үстөк акыларын жөнгө салууну сунуштайт. Ассоциациянын айтымында, бул төлөмдөр азыр жергиликтүү өндүрүшчүлөрдү басмырлоодо.

“Эгерде ата мекендик өндүрүүчү супермаркетке 1 миллион сомго продукция берген болсо, анда ал тармакка комиссия түрүндө 150 миң сом төлөшү керек. Бул бизнес жүгүртүүдөн акча алуу жагынан таасирдүү сумма. Мындан тышкары, ата мекендик өндүрүүчү жүктөлгөн маркетингдик кызмат үчүн берилген продукциянын баасынын 3% - 6% өлчөмүндө төлөйт”, - деп айтылат ассоциациянын маалыматында.

Уюм мыйзам кабыл алынса, ата мекендик өндүрүшчүлөрдөн 1 миллиард сомго жакын каражат бошотулуп, алар өндүрүштү өнүктүрүүгө жана жаңы заводдорду ачууга жумшай турганын эсептеген.