Бүгүн, 12-январда парламент жыйынында мугалимдерди мазактап-шылдыңдаган окуучу же ата-энеге чара көрүү боюнча мыйзам долбоору талкууланды. Ал үч окууда кабыл алынып, учурда президенттин кол коюусуна жөнөтүлдү.
Алгач мыйзам долбоорунда окуучу же ата-эне мугалимге сыйлабастык мамиле жасаса 3 миң сом, ал эми 12 жаштан 16 жашка чейинки балдарга 2 миң сом айып салуу керектиги демилгеленген. Бирок, бул сунушту бир топ депутат четке каккан.
Жыйынтыгында, окуучу мугалимди мазактаса ата-энесине оозеки жана жазуу түрүндө эскертүү берилери белгиленди.
“Мугалим кызматтык милдетин аткарып жатканда окуучу ага жаман сөздөрдү айтып, адепсиз жаңсоолорду көрсөтсө, же социалдык медиа аркылуу мазактаса 1 миң сом айып пул салынат. Бул эреже ата-энелерге дагы тиешелүү болот”, - деп айтылат маалыматта.