Кыргыз-казак чек ара тилкесиндеги өткөрүү жайларынын иштөө тартибинде өзгөрүүлөр болду.  Бул тууралуу УКМКнын Чек ара кызматынын маалымат жана байланыш бөлүмүнөн билдиришти.

 8-январь саат 11:30да төмөндөгү өткөрүү жайлары иштеп жатат:

•  "Чалдыбар-Автодорожный" (КР) - "Сыпатай Батыр-Автодорожный" (РК).  Бул өткөрүү пункту аркылуу Кыргызстандын жарандарына Казакстандын аймагына кирүүгө убактылуу чектөө киргизилди.  Ошол эле учурда Казакстандын аймагында жүргөн кыргызстандыктар мекенине кайтып келе алышат.  Ошондой эле Казакстандын аймагына казакстандыктар жана жүк ташуучу унаалар "Чалдыбар-Автодорожный" өткөрүү пункту аркылуу чектөөсүз өтө алышат.
•  "Ак-Жол - автожол" (КР) - "Кордай-жол" (РК).  Кыргызстандын жарандарынын Казакстандын аймагына кирүүгө чектөө киргизилген, бирок алар коңшу мамлекеттен Кыргызстанга кайтып келе алышат.  Кыргызстандагы казакстандыктар Кыргызстандан өткөрүү пункту аркылуу чыга алышат.  Жарандар жөө гана өтө алышат.
•  "Ак-Тилек - автожол" (КР) - "Карасу-жол" (РК).  Кыргызстандын жарандарына Казакстанга кирүүсүнө убактылуу чектөө киргизилди.  Казакстандын жарандары – жүк ташуучу унаалардын айдоочулары Казакстандын аймагына кире алышат.  Айдоочулар – башка өлкөнүн жарандары Казакстандан Кыргызстанга кире алышат.  Ошондой эле Кыргызстандын жана Казакстандын жарандары өткөрүү жайлары аркылуу мекенине кайтып келе алышат.
• Талас облусундагы "Чоң-Капка - автожол" (КР) - "Айша-Биби - автожол" (РК).  Казакстандын аймагы аркылуу транзит менен жүргөн ККП аркылуу жүк ташуучу унаалар гана өтө алат, ал эми Кыргызстандын жана Казакстандын жарандары өткөрүү пункту аркылуу мекенине кайтып келе алышат.

"Кыргыз-казак мамлекеттик чек ара тилкесиндеги өткөрүү жайларында адамдардын жана транспорт каражаттарынын тыгыны катталган жок", — деп айтылат Чек ара кызматынын маалыматында