Улуттук банк коммерциялык банктарга кардарларды тейлөөнүн сапатын жогорулатуу боюнча чараларды көрүүнү жана банктардын бардык бөлүмдөрүндө банктык кызматтарды көрсөтүүнү көзөмөлдөөнү камсыз кылууну, ошондой эле кардарлардын арасында түшүндүрүү иштерин жүргүзүүнү сунуштады.

Банк тутумундагы жана валюта рыногундагы кырдаалды, ошондой эле дүйнөдөгү геосаясий кырдаалга байланыштуу мүмкүн болуучу тобокелдиктерди азайтуу жана алдын алуу маселелерин 27-майда Улуттук банк жетекчилиги, коммерциялык банктар жана алмашуу бюролору, алмашуу бюролорунун ассоциациясынын өкүлдөрү талкуулашты.

Жыйындын жүрүшүндө Улуттук банктын жетекчилиги акыркы учурда акча которуу системалары аркылуу акча каражаттарын кабыл алуу жана жөнөтүү жана айрым финансы-кредиттик мекемелердин тейлөө сапатына байланыштуу калк тарабынан даттануулардын саны өсүп жатканын белгиледи.

Коммерциялык банктарга кардарларды тейлөөнүн сапатын жакшыртуу үчүн бардык зарыл чараларды көрүүгө чакырышты.

Мындан тышкары, Улуттук банктын жетекчилиги каржы рыногунун бардык катышуучулары, анын ичинде алмашуу бюролору жана алмашуу бюролор ассоциациясы тарабынан банктык кызматтарды керектөөчүлөрдүн укуктарын коргоону камсыз кылуу зарылдыгын белгиледи.