"Кыргызпочтасы" ишканасынын Сокулук райондук филиалында жооптуу адамдардын пенсия, жөлөк пул жана башка төлөмдөр боюнча жалпы суммасы 985 миң 651 сомдук каражаттарды мыйзамсыз пайдалануу фактылары аныкталды. Бул тууралуу Башкы прокуратурадан билдиришти.

Бул факты боюнча прокуратура тарабынан кылмыш иши козголуп, филиалдын башкы бухгалтери А.С., котормо оператору А.А. жана чарба жагынан бөлүм башчысы Э.И. Кылмыш-жаза кодексинин 210-беренеси (“Ишенип берилген мүлктү ыйгарып алуу же коротуу”) менен айыпкер катарында жоопкерчиликке тартылышты.

"Кылмыш иши маңызы боюнча кароо үчүн Сокулук райондук сотуна жөнөтүлүп, мамлекетке келтирилген 985,6 миң сом зыян толугу менен өндүрүлдү", - деп айтылат Башкы прокуратуранын маалыматында.